Капеллодан Абрамовгача – футбол вакиллари Каннаваронинг келиши ҳақида нималар демоқда?

 Ўзбекистон футбол ассоциацияси 2006 йилги “Олтин тўп” соҳиби ва жаҳон чемпиони, италиялик мутахассис Фабио Каннаваро билан миллий терма жамоа бош мураббийлиги борасида расман шартнома имзолагани ҳақида хабар берилганди. Бир қатор футбол олами вакиллари мазкур келишув борасида ўз фикрларини айтмоқда. 

Хусусан, FIFA президенти Жанни Инфантино биринчилардан бўлиб бунга муносабат билдирди. 

“FIFA 2026 Жаҳон чемпионатига хуш келибсиз, қадрли Фабио Каннаваро! 2006 йилда Италия билан сардор сифатида ғалаба қозонганингиздан сўнг, йигирма йил ўтиб сиз илк бор янги роль – Ўзбекистон терма жамоаси бош мураббийи сифатида бу мусобақада иштирок этасиз”, деб ёзди Инфантино ўзининг Instagram саҳифасида.

Ўзбекистон миллий терма жамоасининг собиқ футболчиси Жафар Ирисметов ҳам Фабио Каннаваронинг Ўзбекистон терма жамоаси бош мураббийи этиб тайинланишига ўз муносабатини маълум қилди.

“Ростини айтсам, Каннаваро биз учун жумбоқ. Унинг мураббийлик фаолиятини ўрганар эканмиз, катта ютуқларга эришмаганини кўрамиз. Гап фақат совринларда эмас, балки ўйин услубида ҳам. Аслида у ҳозирча фақат ўйинчи сифатида орттирган номи билан танилган. Ассоциация қарор қабул қилаётганда қайси мезонларга таяниб иш тутганини билмайман. Бундан ташқари, биз кўпроқ ҳужумкор футбол ўйнашга интиламиз. Каннаваро бизга ниманидир бера олади, деб ўйламайман. Ахир, хорижлик мураббий таклиф қилинаётган бўлса, биз ундан ниманидир ўрганишни истаймиз. Мана ҳозир Юрген Клопп бўш – шахсан мен унинг номзодини қўллаб-қувватлаган бўлардим. Ундан биз албатта ниманидир ўрганар эдик.
Бошқа томондан, биз Сречко Катанец тайинланганда ҳам шубҳа билан қарагандик, аммо якунда ҳаммаси яхши бўлди. Жаҳон чемпионати бўйича мақсадлар ҳали расман эълон қилинмаган. Аммо гуруҳ босқичидан чиқиш жамоа учун катта ютуқ бўларди. Ахир, мусобақага бориб, плей-оффга чиқиш вазифасини қўймасликнинг ўзи мантиқсиз”, дейди Ирисметов.

Яна бир Ўзбекистон миллий терма жамоасининг собиқ футболчиси Валерий Кечинов МТЖга Фабио Каннаваронинг бош мураббий этиб тайинланишига изоҳ берди.

“Мен учун Каннаваро қандай мураббийлигини айтиш қийин, чунки мен унинг фаолиятини кузатмайман ва ютуқлари ҳақида кўп нарса билмайман. Аммо бир нарса аниқ – у жуда кучли ва яхши футболчи бўлган. Ҳар қандай ҳолатда ҳам Фабио Ўзбекистон терма жамоасига жуда кўп нарса бера оладиган инсон. Менимча, бу миллий жамоа учун жуда жиддий ва йирик ютуқ. Эҳтимол, мураббий алмаштириш учун маълум сабабларга эга бўлишган”, дейди Кечинов “Чемпионат” нашрига берган интервьюсида.

Италиялик машҳур мураббий Фабио Капелло ҳам “Euro-football” нашрига Каннаваронинг янги лавозими юзасидан изоҳ берди.

“Каннаварони тайинлаш – жуда яхши танлов. У катта тажрибага эга ва албатта Ўзбекистон терма жамоасига ёрдам бера олади”, дейди Капелло.

Самарқанднинг “Динамо” клуби бош мураббийи Вадим Абрамов ҳам Фабио Каннаваро ҳақида ўз фикрини билдирди.

“Каннаваронинг тайинланишига қандай қарайман? Каннаваро футболчилик даврида “Олтин тўп” ютган ажойиб ўйинчи бўлганини биламан. У дарҳақиқат яхши ҳимоячи бўлган. Афсуски, у бизда ўйнамайди, мураббийлик қилади. Яна нима дейиш мумкин, ҳаммасини вақт кўрсатади”, дейди Вадим Карленович.