Фабио Каннаваро Ўзбекистон миллий терма жамоасининг янги бош мураббийи бўлади

Инсайдер Фабрицио Романо машҳур футболчи Фабио Каннаваро 2026 йилги Жаҳон чемпионати доирасида Ўзбекистон миллий терма жамоасининг янги бош мураббийи лавозимини эгаллаши ҳақида ёзди.

“Шартнома шартлари бўйича келишув амалга оширилди, расмий ҳужжатлар 24-48 соат ичида кўриб чиқилиши ва имзоланиши кутилмоқда”, — деган у.

Фабио Каннаваро афсонавий футболчи, Италия терма жамоасининг сардори сифатида 2006 йилда Жаҳон чемпиони бўлган, ўша йили “Олтин тўп” ҳам олган. Аммо у мураббий сифатида биронта эътирофга арзигулик натижага эришмаган, катта халқаро тажрибаси бор, деб ҳам айтолмаймиз, дея фикр билдирмоқда ўзбек сегменти.

Каннаваронинг турли жамоаларга бош мураббийлигидаги статистикаси келтирилмоқда:
«Ал-Насср» (Саудия Арабистони) — 14 ўйин: 6 ғалаба, 5 дуранг, 3 мағлубият;
"Тянсзин Сюансзян" (Хитой) — 50 ўйин: 28 ғалаба, 10 дуранг, 12 мағлубият;
"Гуанчжоу Эвергранд" (Хитой) — 125 ўйин: 79 ғалаба, 23 дуранг, 23 мағлубият;
Хитой миллий терма жамоаси — 2 ўйин: 2 мағлубият;
«Беневенто» (Италия) — 17 ўйин: 3 ғалаба, 7 дуранг, 7 мағлубият;
«Уденезе» (Италия) — 6 ўйин: 2 ғалаба, 3 дуранг, 1 мағлубият;
"Динамо Загреб" (Хорватия) — 14 ўйин: 7 ғалаба, 2 дуранг, 5 мағлубият.

Каннаваронинг айтишга арзигулик нтижалари: 1 мартадан Хитой чемпионлиги, суперкубоги ва 1-лигаси (Хитой Суперлигасидан бир поғона қуйидаги чемпионат) чемпионлиги.
Каннаваро 2024 йил охирида "Динамо Загреб" жамоаси билан 1,5 йиллик шартнома имзолаб, 3,5 ойдан сўнг, қониқарсиз натижалар сабабли бош мураббийликдан кетказилган.

Ўзбекистон терма жамоаси ўз тарихида илк марта Жаҳон чемпионатига чиқди, бундай ҳолатда нега мураббий сифатида омаддан кўра омадсизликка кўпроқ дуч келган мураббий танлангани савол туғдирадиган ҳолат.