Хоразмда тарихий ёдгорликка нисбатан ҳурматсизлик қилган блогерга расмий жазо тайинланди
Хоразм вилоятида миллий меросга нисбатан ҳурматсизлик қилиши билан жамоатчилик эътиборини тортган блогерга нисбатан ҳуқуқий чоралар кўрилди. Ушбу ҳолат ижтимоий тармоқларда тарқалганидан сўнг, фуқаролар ва мутахассислар томонидан қаттиқ танқидга учраган эди.
Очиқ суд мажлиси ўтказилди

Бугун Хива шаҳар судида жамоатчилик иштирокида очиқ суд мажлиси бўлиб ўтди.

Суд жараёнида 2025 йил 24 ноябрь куни Instagram ижтимоий тармоғида тарқалган видеода, Хива шаҳридаги давлат музейи ҳудудида блогер томонидан қасддан юриш-туриш қоидаларини бузиш, тарихий обида ва шахслар ҳайкалларига нисбатан масхараомуз ҳамда ҳурматсизлик билан муносабат билдириш ҳолати бўйича маъмурий иш кўриб чиқилди.

Суд қарори

Суд томонидан мазкур ҳуқуқбузарликни содир этган фуқаро Т.С. га нисбатан қуйидаги жазолар тайинланди:
 • Ўзбекистон Республикаси МЖтК 183-моддаси (майда безорилик)
 • 64¹-модда 1-қисми асосида
 • 10 баробар БҲМ (4 120 000 сўм) миқдорида жарима
 • 7 сутка маъмурий қамоқ
Воқеага муносабат

Кеча ёзганимиздек, мазкур видео тарқалганидан сўнг кенг жамоатчилик томонидан қаттиқ эътироз билан кутиб олинди. Айниқса, тарихий шахслар мероси ва аждодлар хотирасига нисбатан бундай беҳурматлик жиноий эмас, балки маънавий жавобгарликни ҳам талаб қилади, деган фикрлар билдирилди.

Мутахассислар таъкидлаганидек:

“Миллий тарих — бу келажак асоси. Унга қилинган ҳурматсизлик бир шахсга эмас, бутун халқка нисбатан қилинган ҳаракатдир.”

Бу воқеа нафақат бир блогерга нисбатан қўлланилган жазо, балки жамият учун сабоқ сифатида ҳам қабул қилинмоқда. Қонунбузарликка қарши қатъий чора кўрилиши — миллий меросимизни муҳофаза қилиш йўлида муҳим қадамдир.

Ҳар бир фуқаро тарихий обида ва ёдгорликларга ҳурмат билан муносабатда бўлиши шарт.
Интернетдаги контент — омма олдидаги масъулият демакдир.

Хоразмда қонун устуворлиги ва миллий қадриятларга бўлган ҳурмат яна бир бор намоён бўлди.